Hér með er auglýst eftir styrkumsóknum vegna fyrri úthlutunar Menningarráðs Vestfjarða árið 2010. Bent er sérstaklega á nánari upplýsingar í úthlutunarreglum sem samþykktar hafa verið fyrir þessa úthlutun, en þær er að finna undir tenglinum Styrkir hér til hægri. Einnig gefur menningarfulltrúi Vestfjarða allar nánari upplýsingar í s. 891-7372 eða menning@vestfirdir.is. 

Samkvæmt ákvörðun stjórnar Menningarráðs Vestfjarða verður litið sérstaklega til menningarverkefna sem fela í sér eftirtaldar áherslur við fyrri úthlutun ársins 2010:
   a. Eflingu samstarfs á sviði menningarmála á svæðinu
   b. Nýsköpun í verkefnum tengdum menningu
   c. Fjölgun atvinnutækifæra í tengslum við menningarstarf á svæðinu 
   d. Eflingu menningartengdrar ferðaþjónustu og ferðatengdrar menningarstarfsemi

Umsóknarfrestur er til sunnudagsins 28. mars 2010.

Gufudalskirkja

Marsibil G. Kristjánsdóttir, bæjarlistamaður Ísafjarðarbæjar, opnar sýninguna Kirkjur á Vestfjörðum kl. 17 á föstudag í Safnaðarheimili Ísafjarðarkirkju og mun hún standa næstu tvær vikur. Um sölusýningu er að ræða. Boðið verður uppá léttar veitingar á opnuninni á föstudaginn. Allar myndirnar eru í grafík og eru unnar á þessu ári.

Í sýningunni Kirkjur á Vestfjörðum er brugðið upp mynd af fjölbreytileika þessara bygginga á Vestfjörðum. Mikill munur er t.d. á byggingastíl Ísafjarðarkirkju og Gufudalskirkju en báðar þessar kirkjur koma við sögu í sýningunni Kirkjur á Vestfjörðum. Á sýningunni eru myndir af alls tíu kirkjum af öllum Vestfjörðum. Stefnt er að því að sýningin fari á flakk um Vestfirði með vorinu. Verkefnið er styrkt af Menningarráði Vestfjarða.

Mennta og menningarmálamálaráðuneyti auglýsir eftir umsóknum um styrki úr Æskulýðssjóði sem starfar samkvæmt lögum nr. 70/2007 og reglum nr. 60/2008.

Hlutverk Æskulýðssjóðs er að styrkja eftirtalin verkefni á vegum æskulýðsfélaga og æskulýðssamtaka:

# Sérstök verkefni sem unnin eru fyrir börn og ungmenni og/eða með virkri þátttöku þeirra.

# Þjálfun forystufólks, leiðbeinenda og sjálfboðaliða.

# Nýjungar og þróunarverkefni.

# Samstarfsverkefni æskulýðsfélaga og æskulýðssamtaka.

Hvorki er heimilt að styrkja árvissa eða fasta viðburði í félagsstarfi, svo sem þing, mót eða þess háttar viðburði, né ferðir hópa. Mennta- og menningarmálamálaráðherra úthlutar styrkjum úr Æskulýðssjóði að fengnum tillögum stjórnar Æskulýðssjóðs.

Umsóknarfrestur í Æskulýðssjóð er fjórum sinnum á ári, 1. febrúar, 1. apríl, 1. september og 1. nóvember og er umsóknarfrestur auglýstur hverju sinni.

Árið 2010 verða veittir úr Sænsk-íslenska samstarfssjóðnum ferðastyrkir til að styðja íslenska þátttakendur í sænsk-íslenskum og norrænum verkefnum. Markmið sjóðsins er að stuðla að auknu samstarfi Svíþjóðar og Íslands á sviði vísinda, menntunar og menningar.

Um styrki þessa skal sótt á sérstökum vefeyðublöðum sem er að finna á vefslóðinni www.nordiskafonder.se.

Umsóknarfrestur er til 1. febrúar 2010 og skal skila umsóknum rafrænt á vefnum. Styrkjunum verður úthlutað í lok mars.

• Sænsk - íslenski samstarfssjóðurinn
  

Fornleifasjóður auglýsir eftir umsóknum um styrki úr sjóðnum skv. 24. gr. þjóðminjalaga nr. 107/2001. Veittir verða styrkir til verkefna sem stuðla að rannsóknum og varðveislu á fornleifum og forngripum. Umsóknarfrestur er til 15. febrúar 2010. Á fjárlögum 2010 eru 19,1 milljónir króna til ráðstöfunar. Úthlutunarreglur sjóðsins nr. 73/2004 eru birtar í Stjórnartíðindum og á vef mennta-og menningarmálaráðuneytis, menntamalaraduneyti.is.

Umsóknir, í fjórum eintökum, sendist stjórn fornleifasjóðs, mennta- og menningarmálaráðuneyti, Sölvhólsgötu 4, 150 Reykjavík.