Dýrin í Hálsaskógi - ljósm. Ester Sigfúsdóttir

Leiksýningin Dýrin í Hálsaskógi hefur verið ljómandi vel sótt, en tvær sýningar eru búnar á Hólmavík og vel á þriðja hundrað manns hafa mætt á leikritið. Í dag heldur leikhópurinn í leikferð með allt sitt hafurtask, sviðsmynd og búninga, ljós og leikara, hljómsveit, hjálparhellur og tæknimenn. Ætlunin er að sýna í Vogalandi í Króksfjarðarnesi í dag kl. 17:00 og lögðu sviðsmenn af stað í rauða býtið til að undirbúa allt. Alls taka næstum 60 manns þátt í uppsetningunni með einum eða öðrum hætti, en verkefnið er samstarfsverkefni Grunnskólans og Tónskólans á Hólmavík og Leikfélags Hólmavíkur. Megin uppistaða leikarahópsins er í elstu þremur bekkjum Grunnskólans, en einnig taka reyndir leikarar þátt í uppsetningunni.

Ein af myndum Ágústar

Ágúst G. Atlason

« 1 af 2 »

Miðvikudaginn 19. mars mun áhugaljósmyndarinn Ágúst G. Atlason opna ljósmyndasýningu á kaffihúsinu Langa Manga (www.langimangi.is) kl. 17:00. Nefnist sýningin NV Vestfirðir og er það skírskotun í norðanverðir Vestfirðir. Sýndar verða landslagsmyndir frá svæðinu og  eru allar myndirnar prentaðar á striga í stærðinni 50x70cm. Þetta er fyrsta ljósmyndasýning Ágústar.

Einnig tekur Ágúst þátt í samsýningu ljósmyndara og áhugaljósmyndara í  Edinborgarhúsinu, en sú sýning hefst kl. 18:00 sama dag. Ágúst hefur fengist við ljósmyndun síðan 1990, en skoða má sýnishorn af myndum hans á http://gusti.is og
http://flickr.com/druzli.

Sannkallaðir páskatónleikar verða haldnir í Ísafjarðarkirkju á föstudaginn langa 21. mars kl. 17:00. Á tónleikunum verða fluttir valdir þættir úr Jóhannesarpassíunni eftir Johann Sebastian Bach, sem Janusz Frach hefur útsett fyrir litla kammersveit, sönghópa og upplesara. Tónlistarskóli Ísafjarðar fagnar 60 ára afmæli sínu á þessu ári og eru tónleikarnir liður í afmælishaldinu.

Kammersveitina skipa nokkrir nemendur og kennarar Tónlistarskóla Ísafjarðar ásamt tónlistarnemum úr Listaháskóla Íslands, þ.e. Janusz Frach, Maksymilian Frach, Geirþrúður Guðjónsdóttir og Halldór Sveinsson á fiðlu, Bjarni Frímann Bjarnason á víólu, Þorbjörg Daphne Hall á selló og Iwona Kutyla á orgel. Nokkrir stuttir einleikskaflar eru í höndum Arnþrúðar Gísladóttur á þverflautu, Madis Mäekalle  á kornett og Þrastar Jóhannessonar á gítar.

Sönghóparnir eru tveir, annar þeirra er skipaður ungum söngnemum og kórstúlkum sem flestar stunda söng- eða hljóðfæranám við Tónlistarskóla Ísafjarðar en hinn hópurinn er skipaður nokkrum ungum drengjum, sem einnig stunda nám við skólann. Upplestur skipar stóran sess í flutningnum, lesið er beint úr Jóhannesarguðspjalli en einnig eru lesin ljóð og sálmar sem eiga við efnið hverju sinni. Upplesturinn annast þau Þórunn Arna Kristjánsdóttir söngkona og leiklistarnemi og Pétur Markan guðfræðinemi. Það er Janusz Frach, fiðlukennari við Tónlistarskóla Ísafjarðar, sem á hugmyndina að tónleikunum og sér um útsetningar, æfingar og stjórnun, en alls eru þátttakendur í tónleikunum um 25 talsins.

Í Jóhannesarpassíunni er rakin píslarsaga Jesú Krists eins og hún kemur fyrir í Jóhannesarguðspjalli Nýja testamentisins. Tónskáldið fléttar inn í frásögn guðspjallsins textum sem eru hugleiðingar og útlegging á söguþræðinum og þannig eiga áheyrendur þess kost að upplifa píslarsöguna á áhrifamikinn og leikrænan hátt. Orðið passía er latneska heitið á þjáningarsögu Jesú Krists og fyrr á öldum átti samkvæmt helgisiðareglum að lesa alla píslarsöguna við guðsþjónustu á föstudaginn langa.

Tónleikarnir eru haldnir á vegum Tónlistarskóla Ísafjarðar og nýtur skólinn styrkja frá ýmsum fyrirtækljum og stofnunum vegna þessa verklefnis. Aðgangur er ókeypis.

Ríkisútvarpið  Rás 1 mun senda út hina minnisstæðu tónleika Sinfóníuhljómsveitarinnar, Hátíðarkórsins og fleiri vestfirskra tónlistarmanna á Ísafirði þann 24. janúar sl. á pálmasunnudag. Utsendingin verður pálmasunnudag 16. mars kl. 16:10. Þeir sem ekki geta hlustað þá geta hlustað síðar á vef RÚV í 2 vikur eftir útsendingu.

Verkefnið er kynnt undir titlinum: Menningarveisla á Ísafirði. Hljóðritun frá tónleikum Sinfóníuhljómsveitar Íslands á Ísafirði 24. janúar sl.

Á efnisskrá eru:
 
Hátíðarforleikur í A-dúr op. 96 eftir Dmitríj Shostakovitsj.
Píanókonsert nr. 2 í f-moll op. 21 eftir Frédéric Chopin.
Sinfóníetta V eftir Jónas Tómasson - frumflutningur .
Gloría eftir Francis Poulenc.
Einleikari: Anna Áslaug Ragnarsdóttir.
Einsöngvari: Ingunn Ósk Sturludóttir.
Kór: Hátíðarkór Tónlistarskólans á Ísafirði.
Kórstjóri: Beáta Joó.
Stjórnandi: Bernharður Wilkinson.
Umsjón: Una Margrét Jónsdóttir.

Kvikmyndin Heiðin eftir Einar Þór Gunnlaugsson frá Hvilft í Önundarfirði verður frumsýnd í Háskólabíói í kvöld. Myndin var tekin upp á sunnanverðum Vestfjörðum í vor, að mestu í Reykhólasveit. Myndin er íslensk/ensk samframleiðsla og styrkt af Kvikmyndamiðstöð Íslands. Hún skartar hópi glæsilegra íslenskra leikara af yngri og eldri kynslóðinni, og söngkonan Hafdís Huld hefur sungið sérstaklega fyrir myndina mexíkóskt þjóðlag sem tekið var upp í Bretlandi í apríl sl. Þess má geta að á meðal leikara er vestfirski kómedíuleikarinn Elfar Logi Hannesson.

Sagan, sem fjallar um mann sem beðinn er um að fara með kjörkassa út á flugvöll en missir af flugvélinni, er í léttum dúr og gerist í nútímanum. Kostnaður myndarinnar er hóflegur og telst undir meðaltali sé miðar við íslenkar kvikmyndaframleiðslur. Verkefnið er tveggja landa samstarf Íslands og Bretlands, en leikstjórinn Einar Þór hefur m.a. komist að samkomulagi við EMI Music Publishing í London um úfgáfu kvikmyndtónlistar myndarinnar.

Þessi frétt er afrituð af www.bb.is.