Franskur fiðlusnillingur, Gilles Apap, er kominn til Ísafjarðar ásamt fríðu föruneyti. Kemur hann fram á árlegum minningartónleikum um hjónin Sigríði og Ragnar H. Ragnar, en þau stýrðu Tónlistarskóla Ísafjarðar um áratuga skeið og undir stjórn þeirra varð Tónlistarskóli Ísafjarðar öflug menningarstofnun. Balzamersveitin Bardukha og Hjörleifur Valsson koma einnig fram á tónleikunum, sem og Íslenska kammersveitin sem er skipuð 15 hljóðfæraleikurum.

Tónleikarnir verða í Ísafjarðarkirkju og hefjast kl. 20:00, miðvikudaginn 3. október. Fyrir hlé verða flutt verk eftir Bartók og Bach, auk fjölbreytts úrvals þjóðlaga. Eftir hlé leika Gilles Apap og kammersveitin fiðlukonsert Mozarts nr. 4 í D-dúr.

Gilles Apap er þrautreyndur leiðbeinandi og kennari og mun hann halda kynningu fyrir nemendur og kennara Tónlistarskóla Ísafjarðar í Hömrum á morgun kl. 17:30. Þá mun hann einnig vinna með fyrsta árs tónlistarnemum Listaháskóla Íslands sem eru í sinni árlegu Ísafjarðarheimsókn dagana 1.-5. október.

Þess má geta að í för með Apap og félögum eru fiðlusmiðurinn Christophe Landon sem er í hópi bestu fiðlusmiða heims og kvikmyndagerðarmaðurinn Dagur Kári Pétursson sem ætlar að gera heimildamynd um ferð snillingsins hingað til lands.

Sex kvikmyndir alþjóðlegu kvikmyndahátíðarinnar sem nú stendur yfir í Reykjavík verða sýndar á Ísafirði dagana 3.-5. október. Fjölbreytt úrval mynda er á dagskrá. Hátíðin á Ísafirði hefst með sýningu á fjölskyldumyndinni Azur og Asmar klukkan 18:00 miðvikudaginn 3. október. Rætur, félag um menningarfjölbreytni, stendur að hátíðinni á Ísafirði, en Valdimar Halldórsson er formaður Róta.

Sýningar 3. okt: 

Azur & Asmar (Spánn/Ítalía/Belgía/Frakkland), kl. 18.
Bræður munu berjast (Shotgun Stories) (USA), kl. 21.

Sýningar 4. okt:

Bræðrabylta (Íslensk stuttmynd), kl. 19.
Anna (Íslensk stuttmynd), kl. 19:30.
Ský á reiki (Finnland), kl. 21.

Sýningar 5. okt:
 

Andlit fíkjutrésins (Japan), kl. 19.
Öskrarar (Screamers), kl. 21.

Í tillögu Fjármálaráðuneytis að fjárlögum fyrir árið 2008 sem kynnt voru í gær, er lagt til að fjárveiting til Hrafnseyrarnefndar verði hækkað um átján milljónir. 15 milljónir eru til endurnýjunar á Safni Jóns Sigurðssonar og umhverfisframkvæmda á Hrafnseyri og er liður í undirbúningi að hátíðarhöldum árið 2011 vegna 200 ára afmælis Jóns Sigurðssonar forseta. Er það fyrsti hluti af alls 80 milljóna króna tímabundnu framlagi, á næstu fjórum árum. Þá er 3 milljóna króna fjárveiting til Hrafnseyrarnefndar vegna breytinga á starfsskipulagi á Hrafnseyri og ráðstefnuhalds um Safn Jóns Sigurðssonar og Hrafnseyri í samvinnu við Háskólasetur Vestfjarða.

Frá þessu var sagt í Svæðisútvarpi Vestfjarða í dag.

Á 2. hæð Safnahússins á Ísafirði eru nú til sýnis dúkkulísur frá 1960-80. Á Safnavef Ísafjarðarbæjar segir að margar þeirra hafi verið keyptar í Bókabúð Matthíasar Bjarnasonar og Bókhlöðunni á Ísafirði og ekki ólíklegt að einhverjar Ísfirskar konur kannist við gamla félaga.

Dúkkulísur hafa lengi verið vinsæl leikföng, ódýrar og á flestra færi að eignast þær. Einnig voru dúkkulísur oft notaðar til að auglýsa vörur og þá gjarnan á þann hátt að birta þær í blöðum og tímaritum eða jafnvel utan á pakkavörum, t.d. morgunkorni. Vinsældir dúkkulísunnar náðu hámarki á milli 1930 og 1950, en eftir það jókst úrval ódýrra leikfanga til muna. Dúkkulísur endurspegla að sjálfsögðu tískuna á þeim tíma sem þær eru framleiddar, eins og glöggt má sjá á litríkum klæðnaði dúkkulísanna sem heiðra gesti Safnahússins með nærveru sinni!

Melrakkasetur Íslands ehf var stofnað á fundi þann 15. september 2007 í félagsheimilinu í Súðavík. Á stofnfundinum var safnað 1.870.000 krónum í hlutafé og eru hluthafar í Melrakkasetrinu 39 talsins.

Á fundinum voru flutt tvö erindi, Ester Rut Unnsteinsdóttir líffræðingur hélt fyrirlestur um sögu, atferli og líf refa á Íslandi og fór yfir hugmyndir um hvernig starfsemi Melrakkasetursins yrði háttað. Jón Jónsson, nýráðinn menningarfulltrúi Vestfjarða, hélt erindi um þau tækifæri sem gefast með uppsetningu safna og setra. Til samanburðar sagði hann frá uppsetningu Galdrasýningar á Ströndum og fór yfir þau jákvæðu áhrif sem slíkt verkefni getur haft á samfélagið. Ómar Már Jónsson sveitarstjóri Súðavíkurhrepps stjórnaði fundinum.

Í stjórn Melrakkasetursins voru kosin Ómar Már Jónsson, formaður stjórnar, Barði Ingibjartsson, Dagbjört Hjaltadóttir, Ester Rut Unnsteinsdóttir, Þorleifur Ágústsson og til vara var kosinn Böðvar Þórisson.