Tónlistarmaðurinn Þröstur Jóhannesson vinnur nú hörðum höndum að sinni annarri hljómplötu sem ber heitið Vorið góða. Þrjú ár eru liðin síðan fyrsta plata Þrastar Aðrir sálmar kom út og hlaut hún frábærra dóma og viðtökur. Fríður flokkur hljóðfæraleikara er Þresti til halds og traust á Vorinu góða og hefur sá ágæti flokkur hlotið nafnið Þúfutittlingarnir. 

Þúfutittlingarnir eru Stefán Freyr Baldursson gítar, Valdimar Olgeirsson kontrabassi, Halldór Smárason píanó og Tumi Þór Jóhannsson trommur. Einnig kemur Ragnheiður Eirríksdóttir (Heiða kennd við hljómsveitina Unun og Hellvar) við sögu á plötunni og syngur dúett á móti Þresti í laginu: Lóan syngur direndí. Líkt og á fyrri plötu sinni Aðrir sálmar blandar Þröstur saman eigin ljóðum og ljóðum þjóðþekktra skálda. Ljóð eftir þá Bólu Hjálmar og Jónas Hallgrímsson eru þar á meðal.  

Fyrirhugaður útgáfudagur Vorsins góða er 8. apríl næstkomandi og mun Þröstur ásamt Þúfutittlingunum í tilefna þessa blása til útgáfutónleika í Hömrum á Ísafirði kl 21:00 þann dag. 

Laugardaginn 4.apríl kl. 16 heldur Helga Margrét Marzellíusardóttir sópran tónleika í Hömrum. Tónleikarnir eru liður í framhaldsprófi hennar frá Tónlistarskóla Ísafjarðar og lokatónleikar hennar frá skólanum. Á dagskránni eru sönglög eftir Jón Ásgeirsson og Hjálmar Ragnarsson, ljóðasöngvar eftir Schumann, Schubert, Grieg og Sibelius, og aríur eftir Purcell, Mozart og Puccini. Meðleikari Helgu Margrétar á píanóið er Beáta Joó. Aðgangur að tónleikunum er ókeypis og allir velkomnir.  

Helga Margrét Marzellíusardóttir hefur stundað nám við Tónlistarskóla Ísafjarðar allt frá haustinu 1993. Fyrstu tvö árin lagði hún einkum stund á fiðlunám, en haustið 1994 hóf hún nám á píanó, sem var aðalnámsgrein hennar við skólann allt til ársins 2005, oftast undir leiðsögn Sigríðar Ragnarsdóttur. Hún lauk miðprófi í píanóleik vorið 2004.

Helga Margrét byrjaði í söngnámi haustið 2002 meðfram píanónáminu og síðustu árin hefur söngur verið aðalnámsgrein hennar við skólann. Söngkennari hennar hefur frá upphafi verið Ingunn Ósk Sturludóttir. Helga Margrét lauk miðprófi í söng vorið 2007. Helga Margrét hefur alla tíð tekið virkan þátt í tónleikahaldi innan og utan skólans og verið fulltrúi hans við fjölmörg tækifæri. Hún hefur um árabil sungið með kórum skólans og fleiri kórum á svæðinu. Þá hefur hún oft komið fram fyrir hönd Menntaskólans á Ísafirði, var fulltrúi hans í Söngkeppni framhaldsskólanna vorið 2008 og æfði skemmtikórinn Drengjakór MÍ í nokkur ár. Í fyrrahaust kom hún fram í ABBA-sýningu, sem naut ákaflega mikilla vinsælda. Helga Margrét stefnir á framhaldsnám í söng og tónlist næsta vetur.

Í næstu viku verður haldinn á Ísafirði kynningarfundur þar sem fulltrúar evrópskra samstarfsáætlana og þjónustuskrifstofa kynna styrkja- og samstarfsmöguleika á vegum evrópskra áætlana. Fundurinn verður haldinn á Ísafirði, 23. mars,  kl. 11:00 - 15:00 í Þróunarsetri Vestfjarða, Árnagötu 2-4.

Hér er á ferðinni kjörið tækifæri fyrir einstaklinga, skóla, fyrirtæki, stofnanir og samtök að kynna sér möguleika til samstarfs á flestum sviðum menntunar, menningar og atvinnulífs. Meðal þeirra áætlana sem kynntar verða eru Menntaáætlun ESB og Menningaráætlun ESB, einnig Norðurslóðaáætlun, NORA og Evrópa unga fólksins.

Kvikmyndahátíðin Skjaldborg08 er tilnefnd til menningarverðlauna DV sem afhent verða 4. mars n.k. Geir Gestssyni aðalhvatamanni og framkvæmdaraðila hátíðarinnar hefur tekist að koma á fót einstakri kvikmyndhátíð sem hefur hlotið mikið lof og sett svip á Patreksfjörð meðan hátíðin hefur staðið yfir. Gestir og gangandi hafa notið þessa framtaks þar sem fjölbreytt úrval kvikmynda hefur verið til sýnis.

Á Skjaldborg08 var myndin Kjötborg valin mynd hátíðarinnar. Heiðursgestur hátíðarinnar var Albert Maysles sem er einn af kunnustu heimildarmyndagerðarmönnum samtímans.

Umsögn menninganefndar DV um hátíðina segir:

"Skjaldborg 2008, hátíð íslenskra heimildamynda, tókst frábærlega vel. Hjálpaðist þar allt að; fjölbreytt úrval mynda, heiðursgestur af hæsta kaliberi, gott utanumhald, skemmtileg stemmning meðal gesta og afar elskulegar móttökur heimamanna. Svo ekki sé minnst á sjálft kvikmyndahúsið, Skjaldborgarbíó, sem búið er að gera upp af miklum metnaði.¨

Heimasíða hátíðarinnar er www.skjaldborgfilmfestival.is.

Þessi frétt er afrituð af fréttavefnum www.patreksfjordur.is.

Nýbygging Grunnskólans á Ísafirði hefur verið tilnefnd til menningarverðlauna DV 2008. Einnig eru tilnefndar þjónustubygging KGRP við Gufuneskirkjugarð, Menntaskóli Borgarbyggðar, vigtarhúsið á Þorlákshöfn og Fuglasafn Sigurgeirs Stefánssonar á Ytri-Neslöndum í Mývatnssveit. Sterkir litir með hvítum flötum eru notaðir í nýbyggingu GÍ, að því fram kemur í DV. „...svo andrúmsloftið inni er glaðlegt og hæfir vel starfseminni. Skólahúsið er bjart og opið og tengist vel ytra umhverfi. Vel hefur tekist að tengja gamla skólann nýrri starfsemi án þess að bera friðað skólahúsið ofurliði. Viðbyggingin er látlaus og hófstillt og þjónar vel sínum tilgangi," segir í DV. Nýbygging Grunnskólans á Ísafirði er viðbygging við gamla skólahúsið við Aðalstræti, sem var byggt árið 1801 og er nú friðað. Nýbyggingin er jafnframt tenging við svonefndan Nýja barnaskóla sem stendur við Austurveg. Byggingin er niðurstaða samkeppni sem efnt var til árið 2001.

Nýbyggingin er dregin til baka frá götulínu Aðalstrætis og myndar tveggja hæða umgjörð um gamla skólann, sem er áfram helsta einkenni og ímynd skólans. Arkitektar hússins eru Arkiteó, Einar Ólafsson arkitekt FAÍ, en meðhöfundur samkeppnistillögunnar er Örn Þór Halldórsson, arkitekt FAÍ. Aðalverktakar voru Vestfirskir verktakar en ráðgjafar voru Tækniþjónusta Vestfjarða og VST.

Þá er kvikmyndahátíðn Skjaldborg á Patreksfirði tilnefnd sem og kvikmynd Helgu Rakelar Rafnsdóttur, Kjötborg.

Þessi frétt er afrituð af fréttavefnum www.bb.is.