Aðalfundur Menningarráðs Vestfjarða verður haldinn á skrifstofuhótelinu í Neista á Ísafirði þriðjudaginn 30. júní og hefst kl. 16:00. Á dagskrá eru hefðbundin aðalfundarstörf, en sveitarfélögin á Vestfjörðum velja fulltrúa sína á fundinn sem fara með atkvæðisrétt. Í lok fundar verður boðið upp á veitingar.
Það var mikið um dýrðir í Edinborgarhúsinu á Ísafirði í gær þegar úthlutað var styrkjum til menningarverkefna á Vestfjörðum. Þetta var fjórða úthlutun Menningarráðs Vestfjarða og var nú úthlutað samtals 21 milljón til 48 verkefna af margvíslegum toga. Framlög til einstakra verkefna voru á bilinu 50 þúsund til 1,4 milljón og voru verkefni sem fengu milljón eða meira óvenjulega mörg að þessu sinni eða 7 talsins. Margvíslegt samstarf og samvinna milli einstaklinga og stofnanna, listgreina og svæða, setti svip á úthlutunina að þessu sinni og kraftmikil samstarfsverkefni eru býsna áberandi í hópi þeirra verkefna sem fengu styrki. Næst verður auglýst eftir umsóknum í haust.
Yfirlit yfir verkefnastyrki vorið 2009
Útgáfa á hljóðdisk, hönnun nýs hljóðfæris og sérkennileg tónleikaferð (Mugiboogie ehf) - 1.400.000.-
Dynjandi sem kveður að (Eaglefjord - Gallerí Dynjandi) - 1.400.000.-
Völundarhús, upplifunar- og skynjunarleikhús á Patreksfirði (TOS ungmennaskipti) - 1.400.000.-
Margmiðlunarborð og leiklestur skrímslasögunnar (Félag áhugamanna um skrímslasetur) - 1.400.000.-
Tónlistarhátíðin Við Djúpið 2009 (Við Djúpið, félag) - 1.000.000.-
Act Alone 2009 (Act Alone leiklistarhátíð) - 1.000.000.-
Skjaldborg ´09 (Skjaldborg - hátíð íslenskra heimildamynda) - 1.000.000.-
Rokk fyrir firði og fólk! (Hljómsveitin Reykjavík! og Engin miskunn ehf) - 700.000.-
Síðasti dagur Sveins skotta (Kómedíuleikhúsið og Lýðveldisleikhúsið) - 700.000.-
Vestur á fjörðum (Janus Bragi Jakobsson, Tinna Ottesen og Mugiboogie ehf) - 700.000.-
Leiðsögumaðurinn (Félagið Hús og fólk) - 500.000.-
Smiðjan á Vatneyri í máli og myndum (Sjóræningjahúsið ehf) - 500.000.-
Listviðburðir í Edinborgarhúsi (Edinborgarhúsið á Ísafirði) - 500.000.-
Kaktus (Kómedíuleikhúsið) - 500.000.-
Atvinnu- og menningarmálasýning á Ströndum (Þróunarsetrið á Hólmavík) - 500.000.-
Kvöldvökur á Víkingasvæðinu á Þingeyri. Fræðslu- og skemmtidagskrá (Félag áhugamanna um víkingaverkefni á slóðum Gísla Súrssonar) - 500.000.-
Bjarni á Fönix (Ársæll Níelsson) - 400.000.-
Einstök sýning - Vestfirskir einfarar (Marsibil G. Kristjánsdóttir) - 400.000.-
NV Vestfirðir (Ágúst G. Atlason) - 400.000.-
Ísafjörður - húsin á Eyrinni (Vesturferðir ehf) - 400.000.-
Kolbrúnarskáldið kemur í dalinn (Gautshamar ehf) - 400.000.-
Listsýningar á vegum Félags handverksfólks á Vestfjörðum (Félag handverksfólks á Vestfjörðum) - 350.000
Tónlistardagurinn mikli (Tónlistarfélag Ísafjarðar) - 300.000.-
Gullkistan (Byggðasafn Vestfjarða) - 300.000.-
Lífróður á Strandir: listasmiðja - málþing - sýning (Þjóðfræðistofa) - 300.000.-
Matur- og menning í Vesturbyggð - Steinbíturinn 2009 (Samstarfshópur um mat- og menningu í Vesturbyggð) - 300.000.-
Sérsýning um Alfreð Halldórsson - sauðfjárbónda á Kollafjarðarnesi (Sauðfjársetur á Ströndum) - 300.000.-
Blús á Vestfjörðum (Guðmundur Hjaltason) - 300.000.-
Leitin að Gísla - lokaáfangi heimildamyndar (Þjóðfræðistofa) - 300.000.-
"Dívan í Djúpinu" - einsöngshljómdiskur (Ingunn Ósk Sturludóttir) - 250.000.-
Fjallabræður - hljómplata (Fjallabræður) - 250.000.-
Norrænir samspilsdagar 2009 (Félagsmiðstöðin OZON og Tónskólinn á Hólmavík) - 200.000.-
Leiðir til að tengja sögu Djúpsins við menningartengda ferðaþjónustu (Ævintýradalurinn ehf) - 200.000.-
Árlegt Húmorsþing Þjóðfræðistofu - Vetrarhátíð á Ströndum (Þjóðfræðistofa) - 200.000.-
Kaupstaðirnir þrír á Ísafirði - tímarnir þrennir (Ómar Smári Kristinsson) - 200.000.-
Náttúrubörn á Ströndum - fróðleiksfundir og miðlun (Sauðfjársetur á Ströndum) - 200.000.-
DALIR og HÓLAR - handverk 2009 (Björn Samúelsson) - 200.000.-
Sumarið í Hömrum (Tónlistarfélag Ísafjarðar) - 200.000.-
Strandhögg - Landsbyggðaráðstefna sagn- og þjóðfræðinga (Þjóðfræðistofa) - 200.000.-
Sjóferðir, sýning í Skrímslasetrinu (Minjasafn Egils Ólafssonar) - 100.000.-
Ég stend á skíði ... (Rakel Sævarsdóttir) - 100.000.-
Stefnumót safna, sögusýninga og setra á Vestfjörðum (Byggðasafn Vestfjarða og Safn Jóns Sigurðssonar) - 100.000.- Photography exhibition in Djúpavík (Claus Sterneck) - 100.000.-
Sumarmarkaður Vestfjarða 2009 - menningarviðburðir (Samstarfshópur um sumarmarkað Vestfjarða) - 100.000.-
Klæði og kjarna konur á Vestfjörðum - ferðasýning (Þjóðbúningafélag Vestfjarða) - 100.000.-
Undirbúningur að hönnun lita og sögubókar fyrir börn (Raggagarður - Fjölskyldugarður Vestfjarða) - 50.000.-
Sjóvettlingar, suða og sulta (Minjasafn Egils Ólafssonar) - 50.000.-
Hljóðverk fyrir lýsistank og örnefni (Rósa Sigrún Jónsdóttir) - 50.000.-
Fyrri úthlutun Menningarráðs Vestfjarða á árinu 2009 fer fram í Edinborgarhúsinu á Ísafirði nú á fimmtudaginn 28. maí og hefst athöfnin kl. 16:00. Verða þar afhent vilyrði um styrki frá Menningarráði Vestfjarða, en alls eru veittir styrkir til 48 verkefna að þessu sinni á bilinu 50 þúsund til 1,4 milljónir, samtals að upphæð 21 milljón.
Umsóknir sem bárust að þessu sinni voru 89 og var samtals beðið um rúmar 72 milljónir í verkefnastyrki. Styrkirnir fara til fjölbreyttra verkefna sem sýna glöggt þann kraft, frumkvæði og nýsköpun sem einkennir vestfirskt menningarlíf.
Verkefni sem byggjast á samstarfi ólíkra aðila eru áberandi í hópi þeirra verkefna sem styrkt eru að þessu sinni, en sérstök áhersla var lögð á samvinnu og samstarf við úthlutun.
Öllum styrkumsóknum sem bárust hefur verið svarað í tölvupósti á uppgefin netföng með niðurstöðu hvað varðar einstakar umsóknir. Heildarlisti um styrkt verkefni verður birtur á vef Menningarráðsins og sendur fjölmiðlum eftir athöfnina á fimmtudag. Menningarráð Vestfjarða mun næst auglýsa eftir umsóknum um styrki í haust.
Athöfnin er opin öllum og sveitarstjórnarmenn og þeir sem standa í eldlínunni í menningarstarfi á Vestfjörðum eru sérstaklega boðnir velkomnir.
Á dagskrá eru erindi og afhending styrkja og í lokin á þessari formlegu athöfn verður boðið upp á léttar veitingar.
Laugardaginn 16. maí næstkomandi verður haldið Vestfirskt listamannaþing á Ísafirði og er listafólk af öllum Vestfjarðakjálkanum og aðrir áhugamenn um vestfirska list boðnir hjartanlega velkomnir á þingið. Á þinginu verður rætt um stöðu og framtíð listastarfsemi á Vestfjörðum og munu valinkunnir listamenn úr hópi heimamanna segja frá hugðarefnum sínum í þessu samhengi, auk þess sem rætt verður um listahátíðir á svæðinu.
LISTAMANNAÞING VESTFJARÐA
- Staða og framtíð listalífs á Vestfjörðum -
Laugardaginn 16. maí kl. 14 í Edinborgarhúsinu
Fundarstjóri: Jón Jónsson, menningarfulltrúi Vestfjarða
Það eru Menningarráð Vestfjarða og Kómedíuleikhúsið sem standa að listamannaþinginu, en Kómedíuleikhúsið hefur áður staðið tvö ár í röð fyrir slíku þingi fyrir listafólk í Ísafjarðarbæ. Vestfirska listamannaþingið hefst kl. 14:00 og verður haldið í Bryggjusalnum í Edinborgarhúsinu.
Drög að dagskrá:
Minni listanna - fulltrúi frá hverri listgrein fyrir sig flytur pistil um stöðu og framtíð sinnar greinar, einnig má búast við að farið verði um víðan völl í þessum erindum. Fyrirlesarar eru:
Kvikmyndalist, framtíð heimildarmyndargerðar - Kristinn Schram á Hólmavík
Myndlist - Marsibil G. Kristjánsdóttir á Ísafirði
Leiklist - Hannes Friðriksson frá Leikfélaginu Baldri Bíldudal (sökum anna Baldurmanna við söngævintýri í dag þá mun Guðrún Snæbjörg Sigþórsdóttir leikkona á Þingeyri flytja pistilinn)
Ritlist - Jón Páll Halldórsson á Ísafirði
Tónlist - Þröstur Jóhannesson á Ísafirði
Ljósmyndalist - Ágúst Atlason á Ísafirði
Listahátíðir á Vestfjörðum - fulltrúi frá hátíðum er haldnar eru árlega hér vestra, segir frá viðkomandi hátið, tilurð hennar, stutt um söguna og loks um framtíðina. Fyrirlesarar eru:
Act alone, leiklistarhátíð - Elfar Logi Hannesson, stofnandi og listr. stjórn ActAlone.
Aldrei fór ég suður, rokkhátíð - Hálfdán Bjarki Hálfdánsson, rokkstjóri
Skjaldborg, kvikmyndahátíð - Huldar Breiðfjörð, einn af stofnendum
Við Djúpið, tónlistarhátið - Fulltrúi frá hátíðinni
Menningartengd ferðaþjónusta - hvað er það fyrir nokkuð? - Jón Jónsson menningarfulltrúi og fyrrverandi formaður Ferðamálasamtaka Vestfjarða les mönnum pistilinn um þau fræði.
HLÉ - BOÐIÐ VERÐUR UPPÁ KAFFI OG KLEINUR
Sérstakur gestur þingsins Rúnar Guðbrandsson, leikstjóri, flytur erindi um tækifæri og möguleika vestfirskrar listar og listamanna, varpar fram gommu af hugmyndum, stórum sem smáum, framkvæmanlegum og ekki, einnig mun hann fara um víðan völl.
Félag vestfirskra listamanna (FVL) kynnt - Elfar Logi Hannesson kynnir hugmyndina að stofna félag vestfirskra listamanna - ef vel verður tekið í dæmið verður boðað til stofnfundar.
Orðið laust - opnar umræður og uppistand.
Starfsfólki og stjórnendum safna, setra og sögusýninga hefur verið boðið á stefnumót í Edinborgarhúsinu á Ísafirði að kvöldi föstudagsins 15. maí og að morgni 16. maí. Allir áhugamenn um safnastarf og sögutengda ferðaþjónustu eru einnig hjartanlega velkomnir. Stefnumót safna, setra og sýninga á Vestfjörðum og stendur dagskrá frá 20:00-22:00 á föstudagskvöld og 9:00-12:00 á laugardag. Hugmyndin er að þarna hittist fólk sem vinnur að uppbyggingu og þróun safna, setra og sýninga á Vestfjörðum, kynnist hvert öðru og beri saman bækur sínar, skiptist á reynslu og skoðunum, segi frá verkefnum sem verið er að vinna að og ræði um sameiginleg hagsmunamál og frekari möguleika við eflingu þessarar starfsemi.
Dagskrá - föstudagskvöldið 15. maí kl. 20:00
Gestir kynna starfsemi sinna sýninga, safna og setra. Einnig verður kynntur vestfirskur safnabæklingur sem Markaðsstofa Vestfjarða hyggst gefa út í vor.
Laugardagur 16. maí kl. 9:00-12.00.
Umræður, samræður og spjall. Góðir gestir sem flytja fyrirlestra um söfn, setur og sýningar, menningartengda ferðaþjónustu, samstarf, atvinnuuppbyggingu, markaðssetningu og fleira:
Hrafnhildur Ýr Víglundsdóttir, framkvæmdastjóri Selasetursins á Hvammstanga segir dæmisögu um vel heppnaða uppbyggingu seturs og ræðir um möguleika og tækifæri við slíka þróunarvinnu, m.a. við atvinnusköpun.
Guðbrandur Benediktsson sagn- og safnfræðingur, flytur erindi sem hann kallar: Ólíkir pólar? Minjavernd og menningarferðaþjónusta. Guðbrandur hefur einmitt rannsakað þetta efni töluvert, segir frá ólíkum skoðunum og togstreitu milli ólíkrar hugmyndafræði og veltir nú fyrir sér hvort ekki sé gáfulegra að byggja brýr en að dýpka skotgrafirnar.
Gísli Sverrir Árnason hjá fyrirtækinu R3 mun segja frá verkefni sem hann stýrir sem heitir Safnaklasi Suðurlands og byggir á samstarfi safna, setra og sýninga á Suðurlandi.
Jón Jónsson, menningarfulltrúi Vestfjarða dregur saman þræði og ræðir um möguleika svæðisins í þróun og uppbyggingu safna, setra og sýninga, og hvernig hún getur haft sem jákvæðust áhrif á byggð, atvinnulíf og mannlíf.
Allt áhugafólk um safnastarf, sýningahald og sögutengda ferðaþjónustu er hvatt til að mæta á stefnumótið sem er öllum opið. Það eru Valdimar J. Halldórsson forstöðumaður safnsins á Hrafneyri og Guðfinna Hreiðarsdóttir formaður stjórnar Byggðasafns Vestfjarða sem hafa undirbúið stefnumótið, ásamt Jóni Jónssyni menningarfulltrúa Vestfjarða.
