Stjórn Menningarráðs Vestfjarða er nú skipuð fimm fulltrúum sveitarfélaga á Vestfjörðum. Fulltrúar skiptast þannig að einn sameiginlegur fulltrúi er frá Strandasýslu og Reykhólahreppi, einn fulltrúi er frá Vestur-Barðastrandarsýslu, einn sameiginlegur fulltrúi frá Bolungarvík og Súðavíkurhreppi og tveir fulltrúar frá Ísafjarðarbæ.

Starfsemi Menningarráðsins byggir annars vegar á samningi milli sveitarfélaga á Vestfjörðum um menningarmál sem undirritaður var 10. júní 2007 og hins vegar á samningi milli menntamálaráðherra, samgönguráðherra og Fjórðungssambands Vestfirðinga um samstarf ríkis og sveitarfélaga á Vestfjörðum um menningarmál sem undirritaður var 1. maí 2007. Auk þessa samþykkti Menningarráðið í júlí 2007 starfsreglur í formi stofnsamþykktar sem segja til um vinnubrögð og verklag, stjórnarskipun, aðalfund og starfshætti almennt.

Samkvæmt samþykktum og samningum skal Menningarráð Vestfjarða vera samstarfsvettvangur sveitarfélaga á Vestfjörðum um menningarmál og hafa meðal annars það hlutverk að samræma aðgerðir á sviði menningarmála á starfssvæðinu, standa fyrir öflugu þróunarstarfi, úthluta fjármagni til menningarverkefna á Vestfjörðum samkvæmt samningi ríkis og sveitarfélaga og hafa eftirlit með framkvæmd þess samnings.

Samningur milli sveitarfélaga á Vestfjörðum 2007 

Samningur milli menntamálaráðherra, samgönguráðherra og Fjórðungssambands Vestfirðinga 2007 

Stofnsamþykkt og starfsreglur Menningarráðs Vestfjarða 2007